← الدرس الثانى من سلسة Study Java With Me بعنوان "naming convention"

بسم الله الرحمن الرحيم
                                                             

النهاردة هنعرف  مصطلح مهم جدا قبل مانتكلم فى أى حاجة فى الجافا
الـ   naming convention طريقة التسمية
طبعا هو عبارة عن حبة معايير أو شروط  لطريقة كتابة أسماء الحزم packages والـفئات classes والدوال أو الوظائف methods or functions والمتغيرات variables بطريقة متعارف عليها فى مجال صناعة البرمجيات على الأقل لما حد يجى يبص على الـ source code بتاعك يعرف يقرأ الكود على الأقل ديه أول خطوة فى تنظيم شغلك وأنت بتكتب الكود ولازم نعرف كويس أن كل حاجة فى البرمجة ماشية بمعايير لازم نمشى عليها

نسمى الله بقا ونبدى بأول حاجة أسمها
1 ←  الـ packages :
لما تيجى تكتب أسم packages يفضل ياحبيب أنك تكتبها كلها حتى لو أكتر من كلمة بـ small letter
على سبيل المثال :

             ; package newstrart 
; package invitfriends 

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
2← الـ Class
أولا : أسم الـ Class لأزم يكون أسم مش فعل وأسم موجود فعليا بيعبر عنه مش أى أسم كده وخلاص
ثانيا :أول حرف منه لازم يكون Capital ولو أسم الـ Class بيتكون من أكتر من جزء يبقا لازم كل حرف من أول كل كلمة يكون حرف Capital بردك وطبعا يكونوا لازقين فى بعض
على سبيل المثال :

 ; public class TheUniversity
   ; public class Scholarship

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

3← الـ methods or functions
أولا : مبدأيا كده مفيش فرق بين أسم الـ methods والـ functions الأثنين بيعملوا نفس الشئ بس الأختلاف فى الأسم بس خلينا نكون عارفين إنها فى لغة الـجافا بيكون إسمها method اما كلمة function ديه هنلاقيها فى لغات برمجة تانية عادى وفى الأول وفى الأخر الأتنين واحد .
ندخل فى الموضوع ...
ثانيا : أسماء الـ methods  دايما بتكون أفعال لأنها عادةً  بتمثل فعل معين أو تصرف معين وبتبدأ بـ small letter وكل جزء بعد كده بيبدأ بحرف Capital 
على سبيل المثال

 ;()getProductName

 ;()getFirstName
;()getOutcome

;()chooseYourFavouriteHobby

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
4 ← الـ variables 

أولا: أسماء المتغبرات بتبدأ دايما بـ small letters وكل جزء فى أسم المتغير بعد كده بيكون Capital Letter
ثانيا : يفضل أسم المتغير يكون name بيعبر عن القيمة إللى شايلها زى مثلا 

 ; String productName
 ; int calculate
  ;  String customerName

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
 5←  الـ constant variable 

يطلع إيه داه طيب عشان نعرف معيار كتابته بشكل صح ؟!
ديه ياحبيب نوع خاص من المتغيرات قيمتها  بتتحط مرة واحدة وبتفضل ثابتة مش بتتغير وديه إسمها بيكون كله Capital Letters وبفصل بين كل جزء والتانى بـ _ أيوة بـ underscore إللى هى الشرطة السفلية بوص زى كده _ _ _ _
على سبيل المثال ..

 ; public static final int Minimum _Number 
 ; public static final int Max_Value 

← أوعى تقلق من كلمة final و public و private و static  أنا بس بعمل مثال عشان المعلومة توصل وكله جاى فى السكة .. كله هيتشرح إن شاء الله بشكل مبسط don't worry
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
← دلوقتى كده أنت فهمت يعنى إيه مصطلح "naming convention" وكمان عرفت الزاى تمشى على المعاير ديه
أن شاء الله تباعا بعد كده هبتدى أدخل فى الغوبط فتابع معايا لو حابب
لانى هتكلم فى الـ oop والـ controlling program flow و الـ Modifiers Access Specifiers Essential Java Classes
والـ  Multi-Threading والـ data types والـ inner classes وهتكلم كمان بأمر الله عن event handling والـ operators 
مش هسيب حاجة فى الجافا  و إن شاء الله كل داه هيكون بأسلوب بسيط عشان نفهم مش أكتر 

فلو أنت مبتدىء خالص خليك معايا للأخر إن شاء الله هتستفاد ولو أنت بتراجع زى حالاتى  أو بتذاكر جافا أركب معايا القطر وأن شاء الله هتستفاد بردك 

←  بس كده يامؤمن .. سلام عليكم 😊